Plantun de Prouvènço

Pèr coumpara dos planto d'encò nostre

Ervum gracile & Scleranthus annuus

Ervum gracile

Fabaceae Leguminosae

Nom en français : Vesce à fleurs lâches.

Descripcioun :
Aquelo vesso dóu gènre Ervum fai de pichòti flour (7 mm), roso à vióuleto, souvent groupado pèr 3. Se recounèis peréu à si fueio coumpausado, emé 2 à 6 (8) paréu de fueioun prim, e acabado pèr uno vediho. La planto rebalo au sòu o pòu grimpa. Li dòusso caupon de 5 à 6 grano.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).

Port : Erbo
Taio : 10 à 60 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Ervum
Famiho : Fabaceae
Famiho classico : Leguminosae

Ordre : Fabales

Coulour de la flour : Roso
Petalo : irreguliero
Ø (o loungour) flour : 5 à 9 mm
Flourido : Printèms

Sòu : Si (Ca)
Autour basso e auto : Pancaro entresigna
Aparado : Noun
Abriéu à jun

Liò : Champ - Roucaio - Tepiero seco
Estànci : Termoumediterran à Mesoumediterran
Couroulougi : Eurimediterrano
Ref. sc. : Ervum gracile (Lois.) DC., 1813 (= Vicia tetrasperma subsp. gracilis (Lois.) Hook.f., 1870 )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.